Në Kosovë sot pritet të arrijnë 4 mijë e 680 vaksina Pfizer

Në Kosovë, sot pritet që të arrijnë 4680 dozat e para të vaksinës anti-COVID të llojit Pfizer.

Vaksinat Pfizer janë pjesë e kontingjentit të 95 mijë vaksinave Pfizer që Bashkimi Evropian do t’i sjellë në Kosovë.

Kjo është konfirmuar nga zyra për komunikim me media e Ministrisë së Shëndetësisë, nga e cila kanë deklaruar se edhe javëve në vazhdim do të arrijnë disa kontingjente, duke mos dhënë më shumë detaje.

“Sot pritet të vijnë 4680 vaksina Pfizer të BE-së. Edhe gjatë javëve në vijim pritet të vijnë kontingjent deri në marrjen e të gjitha 95 000 dozave”, thuhet nga MSH.

Kujtojmë që ditë më parë presidentja e Komisionit Evropian, Ursulua Von Der Leyen, ka konfirmuar se 95 mijë doza të vaksinave do të ndahen për Kosovën nga BE-ja duke filluar nga muaji maj e deri në gusht.

Kosova aktualisht nuk ka asnjë dozë të asnjë lloj vaksine anti-COVID, dhe është vendi i fundit në rajon që ka nisur imunizimin e qytetarëve kundër pandemisë.

Deri më tani janë vaksinuar 24 mijë qytetarë të Kosovës me vaksinat AstraZeneca që kishin arritur në Kosovë më 28 mars 2021.

Edhe këto doza të vaksinave anti-COVID i janë dhuruar qytetarëve të Kosovës për imunizim nga COVAX.

Related posts