Qytetarët do fitojnë zbritje në faturat e rrymës nga janari deri në maj

Kompania Kosovare për Furnizim me Energji Elektrike, KESCO përmes një njoftimi për media ka njoftuar se nga janari deri në maj, qytetarët do të kenë zbritje në faturat e energjisë elektrike. Kjo sipas KESCO bëhet e mundur bazuar në Ligjin për Rimëkëmbje Ekonomike, që e parasheh edhe subvencionimin e konsumatorëve të energjisë elektrike.

“Ligji për Rimëkëmbje Ekonomike parasheh edhe subvencionimin e konsumatorëve të energjisë elektrike. Pjesa e energjisë elektrike që ata paguajnë për energjinë elektrike që e marrin nga prodhuesit e energjisë nga burimet e ripërtëritshme do të subvencionohet. Kjo, pasi qeveria në bazë të ligjit ka ndarë një shumë deri në 16 milionë euro, e cila do t’u jepet atyre prodhuesve përmes KOSTT-it. Pra, mjetet do të derdhen në këtë kompani e nga aty tek prodhuesit. Kjo do të zgjasë nga janari deri në maj. Kjo nënkupton që shuma që e përfitojnë këta prodhues, do t’u  zbritet konsumatorëve”, thuhet në njoftim.

Qeveria ka ndarë 16 milionë euro për pesë muajt e parë të vitit, që do t’u jepen prodhuesve të energjisë elektrike nga burimet e ripërtëritshme, e kjo do të ndikojë në subvencionim të qytetarëve.

Në bazë të kalkulimeve del që konsumatorëve do t’ iu zbritet në faturat e tyre çmimi prej 0.0061 cent për kilovat/orë të shpenzuar nga tash deri në maj. Kjo nënkupton që nëse një konsumator ka shpenzuar 1000 kilovat/orë gjatë 1 muaji, fatura do t’i vije 6.1 euro më lirë.

Related posts